NDA-K hpe Mung Masa Hpung nre lam ndau

Jinghpaw Wunpawng Amyu sha gaphkat jahkring langnak lang u hpung langai rai nga ai NDA-K gaw Myen hpyen gumshen SPDC ni a Ga Jarit Sin Hpyendap hku galai shai na hpe hkap la sai lam 2009 June shata 24 ya shani galaw ai zuphpawng ka matsing ( http://www.mediafire.com/file/nzhnm32kz0z/NDAK\%20to\%20BSF.pdf ) hta mu hti lu sai rai nga ai.

Dai zawng NDA-K a Ningbaw Kaba Zahkung Ting Ying hku nna tara shang hkap la ai lam gaw Myen mayam n tai mayu ai Jinghpaw Wunpawng Amyu sha ni yawng a shari jahpoi ai lam rai nga sha n ga, Ningbaw Kaba Zahkung Ting Ying gaw NDA-K hpyi hpun nna tingyen ahkyu ara hpe sha yu ai amyu sha ningbaw langai re ai lam hpe asan sha mu lu sai rai nga ai.

NDA- K u hpung hpe Ningbaw Kaba Zahkung Tingying hku nna Myen hpyen gumshen a mayam tai woi ai ladat hpe tsep kawp ninghkap nna NDA-K gaw myen a mayam Jarit Sin Dap sha rai nna, amyu sha rawt malan langnak lang hpung n rai sai lam Jinghpaw Wunpawng mung shawa yawng hpang de n dau shana dat ai.

Myu tsaw share teng ai NDA-K hpung shang ni yawng tai hpyen a shangun ma mayam, lakung lakap hku n galaw ai sha, amyu sha lawt lu lam hpe madung da let ninggawn hpyen SPDC gumshem hpe tinang hta nga ai atsam mahkra hte ninghkap ga ngu ga saw lajin dat ai. Myen hpyendap a n pu n rawng na ni yawng, Myen dap kata n shang ai uhpung ni de shang wa na matu mung saw shaga ai.

Myen hpyen gumshen mayam lai ladat hpe ninghkap ai ni yawng ta masat lek mat htu lawm let, NDA-K gaw anhte amyu sha ni a lu ang ai ahkaw ahkang gawng malai tai, hpyi ya ai mung masa uhpung nre lam hpe ndau shabra masat lawm nngai.