Osabide euskaraz

Lehen mailako atentzioan erizainek eta medikuok erabiltzen dugun Osabide programa informatikoa euskaraz eskain dezaten eskatu nahi dugu; alde batetik euskaraz lan egiteko eskubidea bermatzeko, eta bestetik pazienteen hizkuntza eskubideak bermatzeko, kasu honetan eta eurek  horrela nai ezkero historia klinikoa euskaraz izan dezaten.

Izan ere, Osakidetzako Kontseiluak 2005eko maiatzaren 27an onartu zuen Euskara Plana, gure erakundean euskararen erabilera normalizatzeko asmoz egindakoa. Euskara plana edo egitasmoa, bere hitzetan, “herritar guztien hizkuntza eskubideak babesteko, gure gizarteak adierazitako nahiari eta berariaz eskatutakoari egoki erantzunez” asmoarekin sortu zen.

Plan honen lehenengo atalean (Osakidetzaren euskara planaren helburu orokorrak) euskara lan hizkuntza bezala bultzatzea helburuetako bat da, eta horrela dio: “Zerbitzu-erakundeek hizkuntza ofiziala ahoz eta idatziz erabiltzeko jarraibideak ezarriko dituzte, euskara lan hizkuntza izateko behar diren baldintzak betetzen dituzten unitate-sanitarioetarako edo administrazio unitate edo orokorretarako.” (1.3 atala, Euskara lan hizkuntza).

Aurrerago, 4. atalean (Euskararen erabilerako irizpideak), eta hain zuzen hirugarren puntuan (4.3 Aplikazio informatikoak eta beste hainbat baliabide material) horrela dio: “Bestalde, baliabide teknikoak eskuratzeko modua egonez gero, Osakidetzako jarduera sanitario eta administratiboari eusten dioten tresna informatiko espezifikoek bi hizkuntza ofizialetan jarduteko aukera eman beharko diete erabiltzaileei.”

Egia da aurrerapenak lortu direla euskararen erabilpenaren normalizazioan, baina ez da nahikoa eta pazienteen zein langileon hizkuntza eskubideak ez dira osorik bermatzen Beraz, Osabide programa informatikoa euskeraz eskaintzea Osakidetzaren betebeharretako bat da.